माहिती अधिकार कार्यकर्ते वृषभ सदाशिव इंगळे यांच्या लढ्याला मोठे यश! गटविकास अधिकारी श्रीकृष्ण इंगळे साहेब यांची धडक कारवाई

माहिती अधिकार कार्यकर्ते वृषभ सदाशिव इंगळे यांच्या लढ्याला मोठे यश! गटविकास अधिकारी श्रीकृष्ण इंगळे यांची धडक कारवाई

​जामनेर:

तालुक्यातील ग्रामपंचायत अधिकाऱ्यांच्या उपस्थितीबाबत आता पंचायत समिती प्रशासनाने कडक पाऊल उचलले आहे. जामनेरचे गटविकास अधिकारी श्रीकृष्ण इंगळे साहेब यांनी सर्व ग्रामपंचायत अधिकाऱ्यांना आपली हजेरी जीपीएस किंवा बायोमेट्रिक प्रणालीच्या माध्यमातूनच नोंदवणे अनिवार्य केले आहे. ज्या कार्यालयांमध्ये अद्याप ही यंत्रणा नाही, तिथे ती त्वरित बसवून घेण्याचे सक्त व लेखी आदेश त्यांनी ११ जुलै २०२६ रोजी काढले आहेत.

​माहिती अधिकार कार्यकर्ते वृषभ इंगळे यांचा पाठपुरावा:

प्रशासकीय कामकाजात पारदर्शकता यावी आणि अधिकारी मुख्यालयात वेळेवर उपस्थित राहावेत, यासाठी जामनेर येथील माहिती अधिकार कार्यकर्ते वृषभ सदाशिव इंगळे यांनी प्रशासनाकडे सातत्याने व चिकाटीने पाठपुरावा केला होता. यासंदर्भात त्यांनी ‘आपले सरकार’ पोर्टलवर ऑनलाईन तक्रार दाखल करून या प्रश्नाकडे लक्ष वेधले होते.

​तसेच, ग्रामविकास विभागाच्या उपसचिव तथा प्रथम अपिलीय अधिकारी श्रीमती सीमा जाधव यांच्यासमोर माहितीचा अधिकार अधिनियम २००५ अंतर्गत झालेल्या सुनावणीत वृषभ इंगळे यांनी हा मुद्दा प्रभावीपणे मांडला. त्यांच्या या लढ्यामुळेच सुनावणीदरम्यान बायोमेट्रिक व जीपीएस प्रणालीनुसार हजेरी घेण्याबाबत सक्त सूचना देण्यात आल्या होत्या.

​गटविकास अधिकारी श्रीकृष्ण इंगळे साहेब यांचा दणका:

याच सुनावणीचे आणि राज्य शासनाच्या डिसेंबर २०२४ मधील पत्राचे संदर्भ देत पंचायत समितीने हे नवीन परिपत्रक काढले आहे. गटविकास अधिकारी श्रीकृष्ण इंगळे साहेब यांनी या प्रकरणाची तत्काळ दखल घेत प्रशासकीय पातळीवर अत्यंत वेगाने सूत्रे हलवली आणि कडक आदेश जारी केले. प्रशासनाला शिस्त लावण्यासाठी गटविकास अधिकाऱ्यांनी उचललेल्या या कठोर पावलाचे सर्वत्र कौतुक होत आहे. या आदेशामुळे आता प्रत्येक ग्रामपंचायत अधिकाऱ्याला आपल्या कार्यालयात बायोमेट्रिक हजेरी लावणे बंधनकारक झाले आहे.

​पारदर्शकतेच्या दिशेने मोठे पाऊल:

या निर्णयामुळे ग्रामीण भागातील प्रशासकीय कामकाजात अधिक शिस्त येईल आणि नागरिकांची रखडलेली कामे वेळेवर मार्गी लागतील, अशी अपेक्षा व्यक्त केली जात आहे. प्रशासकीय स्तरावर माहिती अधिकाराचा (RTI) प्रभावी वापर करून व्यवस्थेत कसा सकारात्मक बदल घडवून आणता येतो, हे वृषभ इंगळे यांच्या यशावरून पुन्हा एकदा स्पष्ट झाले आहे. तर दुसरीकडे, या बदलाची अंमलबजावणी करण्यासाठी गटविकास अधिकारी श्रीकृष्ण इंगळे साहेब यांनी दाखवलेली तत्परता तालुक्यासाठी दिशादर्शक ठरली आहे.