जामनेर – वृषभ सदाशिव इंगळे ( प्रतिनिधी)
जनतेच्या मनातली बदलती प्रतिमा एक काळ होता… जनतेची अवस्था कितीही वाईट झाली, तरी राजकारणी नेते आपल्या गाडीतून, एसी हॉलमधून लोकांना हात हलवून पाहायचे. त्यामुळे जनतेच्या मनात राजकारणी म्हणजे केवळ सत्ता आणि पैशाच्या मागे धावणारा वर्ग, असा समज पक्का झाला होता.
पण २०१४ नंतर महाराष्ट्राने वेगळं दृश्य पाहिलं. एखादा नेता रात्री अडीच वाजता जनतेसाठी धावत आहे, छातीएवढ्या पाण्यात उतरून मदत करत आहे, शेतकऱ्यांच्या दुःखात खांदा देत आहे – हे दृश्य म्हणजे गिरीष महाजन.
परदेशात अडकलेल्यांसाठी धावणारा आपला माणूस
युक्रेनमध्ये युद्ध सुरू असताना महाराष्ट्रातील विद्यार्थी अडकले. पालकांच्या डोळ्यात भीती आणि अश्रू होते. दिल्ली-मुंबईत बसून आदेश देणं सोपं होतं, पण गिरीषभाऊ स्वतः विमानतळावर धावले. विद्यार्थ्यांच्या आईवडिलांना आधार देत, मुलांना सुरक्षित आणण्यासाठी त्यांनी दिवस-रात्र एक केला.
पहलगाम दहशतवादी हल्ल्यानंतर अडकलेले महाराष्ट्रातील नागरिक हेही त्यांच्या कार्यशैलीचं उदाहरण. गिरीषभाऊ स्वतः श्रीनगरपर्यंत गेले आणि लोकांना सुखरूप बाहेर काढलं.
उत्तराखंड महापूरात डझनभर महाराष्ट्राचे पर्यटक अडकले होते. संपर्क बंद, वाहतूक ठप्प. तेव्हा गिरीषभाऊंनी प्रत्यक्ष प्रशासनाशी बोलून हेलिकॉप्टर, बोट, रस्ता यांचा वापर करून पर्यटकांना सुरक्षित महाराष्ट्रात आणलं.
नेपाळमध्ये भूकंपानंतर महाराष्ट्रातील असंख्य लोक अडकले होते. तेव्हा मदतीसाठी पहिला हात पुढे करणारे गिरीषभाऊ होते.
महाराष्ट्रातील आपत्तीसमयी “संकटमोचक”
पूर असो, दुष्काळ असो किंवा अतिवृष्टी – प्रत्येक आपत्तीच्या काळात लोक म्हणतात, “गिरीषभाऊ आले म्हणजे मदत येणारच.”
छातीएवढ्या पाण्यात उभं राहून त्यांनी स्वतः लोकांना बाहेर काढलं. त्यांच्या पांढऱ्या खादीच्या कुर्त्यावर चिखल उडला, पण जनतेला आधार मिळाला.
> स्थानिक शेतकरी सांगतात –
“पूर्वी आमचं नुकसान पाहायला कुणी यायचं नाही. पण गिरीषभाऊंना आम्ही शेतात, पाण्यात, चिखलात आमच्यासोबत पाहिलं आहे. त्यामुळे आम्हाला सरकारवर विश्वास आहे.”
झंझावाती दौऱ्यांनी लोकांना दिला दिलासा
आज पाचोरा-भडगाव तर उद्या धाराशिव, नंतर बीड, बार्शी, परांडा – असा झंझावाती दौरा गिरीषभाऊ करत आहेत.
एका गावात ते शेतकऱ्यांच्या आक्रोशाला प्रतिसाद देतात,
दुसऱ्या गावात घरदार उद्ध्वस्त झालेल्यांना मदत पोहोचवतात,
तर तिसऱ्या ठिकाणी प्रशासनाला आदेश देऊन तत्काळ दिलासा देतात.
तहान-भूक विसरून, आराम विसरून, जनतेसाठी धावणं हेच त्यांचं ध्येय आहे.
लोकांच्या मनातली भावना
सामान्य नागरिकांच्या मनात आज एकच वाक्य आहे –
“आपल्या माणसांसाठी धावणारा आपला माणूस म्हणजे गिरीषभाऊ महाजन.”
ज्या महाराष्ट्रावर आज अतिवृष्टीचं संकट कोसळलं आहे, त्यात लोक निराश झाले असते. पण या अंधाऱ्या ढगांना फाडून आशेची सोनेरी किनार देणारे नेतृत्व म्हणजे गिरीषभाऊ.
